ஹரியானா சாமியார் தலைமையகத்தைச் சுற்றி ராணுவம், போலீஸ் குவிப்பு

இந்தியாவின் வட மாநிலமான ஹரியானாவில் உள்ள சிர்ஸாவில் தேரா சச்சா செளதா என்ற அமைப்பு உள்ளது. 1948-ஆம் ஆண்டு பலூசிஸ்தானில் இந்த அமைப்பு மஸ்தானி பலூசிஸ்தானி என்பவரால் தொடங்கப்பட்டது.

1960-ஆம் ஆண்டில் அவர் மரணம் அடைந்த பிறகு அவரது சீடரான சத்னம் சிங் தேரா சச்சா செளதா தலைவரானார்.

1991-ஆம் ஆண்டில் அவர் உயிரிழந்த பிறகு, குர்மீத் ராம் ரஹீம் சிங் டிஎஸ்எஸ் அமைப்பின் தலைவரானார்.

மதசார்பற்ற நிலை, சமமான வாய்ப்பு, உண்மை, நம்பிக்கை, கருவியான செல்வத்தை நிராகரிப்பது ஆகியவை தனது கொள்கையாக குர்மீத் சிங் அறிவித்தார்.

படத்தின் காப்புரிமைTWITTER

அவருக்கு இந்தியா மட்டுமின்றி உலகம் முழுவதும் அமெரிக்கா, கனடா, ஐக்கிய அரபு அமீரகம், ஆஸ்திரேலியா, ஐக்கிய ராஜ்ஜியம் ஆகியவற்றில் சுமார் ஆறு கோடி பக்தர்கள் உள்ளதாக தேரா சச்சா செளதா அமைப்பு கூறுகிறது.

பேரிடர் மீட்பு காலங்களில் நிவாரணப் பணியில் ஈடுபடுவதற்காக மருத்துவர்கள், பொறியாளர்கள், வர்த்தர்கள், மீட்புக் குழுவினர் உள்பட சுமார் 70 ஆயிரம் பேரை தன்னார்வலர்களாகக் கொண்ட ஷா சத்னம் ஜி பசுமை படையை குர்மீத் சிங் நிறுவியுள்ளார்.

பாலியலுக்கு எதிராகவும், அடிமைப்படுத்தப்படும் பாலியல் தொழிலாளர்களுக்கு எதிராகவும் இவரது அமைப்பைச் சேர்ந்த தன்னார்வலர்கள் 2009-ஆம் ஆண்டில் குரல் கொடுத்தார்.

அதைத்தொடர்ந்து பாலியல் தொழிலில் ஈடுபட்டவர்களை திருமணம் செய்து கொள்ள அவரது அமைப்பைச் சேர்ந்த ஏராமான தன்னார்வலர்கள் முன்வந்தனர்.

படத்தின் காப்புரிமைTWITTER

இதனால் அவரது அமைப்பு இந்தியா மட்டுமின்றி உலக நாடுகளில் உள்ள சமூக அமைப்புகளின் கவனத்தை ஈர்த்தது.

யோகா குரு பாபா ராம்தேவ் "பதாஞ்சலி" நிறுவனம் மூலம் ஆயுர்வேத மருந்து பொருட்களை விற்பனை செய்வது போல, குர்மீத் சிங்கின் அமைப்பும் சிர்ஸாவில் இருந்தபடி ஆயுர்வேத பொருட்கள் விற்பனையை செய்து வருகிறது.

ராஜஸ்தானின் மோடியா பகுதியில் 1967-ஆம் ஆண்டு, ஆகஸ்ட் 15-ஆம் தேதி குர்மீத் சிங் பிறந்தார்.

ஆன்மிக பணிகள் மட்டுமின்றி, திரைக்கதை வசனம், இயக்கம், இசை அமைப்பு, பாடல்கள் பாடுவது ஆகியவற்றிலும் குர்மீத் சிங்குக்கு ஆர்வம் உள்ளது.

படத்தின் காப்புரிமைWEBSITE

அதனால், "எம்எஸ்ஜி: மெசேஞ்சர் ஆஃப் காட்" என்ற படத்துக்கு அவரே வசனம் எழுதி, பாடல்களைப் பாடி நடித்துப் படத்தை வெளியிட்டார். இதனால் ராஜஸ்தான் மாநிலத்தில் அவரது புகழ் பரவியது.

2015-ஆம் ஆண்டில் அவரது படம் வெளியானபோது, அதற்கு தணிக்கை சான்றிதழ் வழங்கியதற்கு எதிர்ப்பு தெரிவித்து, தணிக்கை குழு உறுப்பினர் லீலா சாம்சன் தனது தலைவர் பதவியை ராஜிநாமா செய்தார்.

2001-ஆம் ஆண்டு முதல் இதுவரை சுமார் ஆறு ஆல்பங்களை வெளியிட்டுள்ளதாக அவர் கூறுகிறார்.

2007-ஆம் ஆண்டில் தன்னை சீக்கிய வழியில் வந்த மத குருவாக அவர் தன்னைத்தானே அறிவித்துக் கொண்டதால் பஞ்சாப் மற்றும் ஹரியானாவில் உள்ள சீக்கியர்களின் அதிருப்திக்கு ஆளானார்.

இதன் விளைவாக அவரது அமைப்பு கிளைகளுக்கு எதிராக சீக்கியர்கள் போராட்டங்கள் நடத்தி மிகவும் தீவிரமானது.

படத்தின் காப்புரிமைGETTY IMAGES

பஞ்சாப் சட்டப்பேரவைக்கு இந்த ஆண்டு தொடக்கத்தில் தேர்தல் நடந்தபோது, பாரதிய ஜனதா கட்சி - அகாலி தளம் கூட்டணிக்கு வெளிப்படையாக தனது ஆதரவை அளித்தார்.

அதற்கு முன்னதாக, 2007-ஆம் ஆண்டில் பஞ்சாப் தேர்தலில் காங்கிரஸுக்கு குர்மீத் சிங் ஆதரவு தெரிவித்தார். பஞ்சாப் மாநில காங்கிரஸ் தலைவரான ஹர்மிந்தர் சிங் ஜஸ்ஸியின் மகளை தனது மகனுக்கு இவர் திருமணம் செய்து வைத்தார்.

குர்மீத் சிங் மீது இரு பாலியல் வழக்குகள், தனது ஆண் ஆதரவாளர்களுக்கு ஆண்மை நீக்க பரிசோதனை செய்ய தூண்டியதாக வழக்கு, ஆயுத பயிற்சி வழங்கியது, ஒரு கொலை வழக்கு ஆகியவை நிலுவையில் உள்ளன.

சர்ச்சைகள் நிறைந்த இவரது வாழ்வில், பல கொலை மிரட்டல் மற்றும் கொலை முயற்சி சம்பவங்கள் நடந்துள்ளன. இதனால் உயர் ரக லெக்சஸ் சொகுசு காரை குண்டு துளைக்காத வாகனமாக இவர் வடிவமைத்தார்.

ஒரே நேரத்தில் ஆன்மிகம், அரசியல், கலை, சினிமா, இசை, ஆயுர்வேத மருத்துவம் என பல துறைகளில் ஆர்வம் காட்சியதால் குர்மீத் சிங் வெகு சீக்கிரத்தில் பஞ்சாப் மற்றும் ஹரியானா மாநிலங்களில் பிரபலமானார் என்று உள்ளூர்வாசிகள் கூறுகின்றனர்.

பாலியல் வன்புணர்வு வழக்கில் குற்றவாளி என சி.பி.ஐ. நீதிமன்றத்தால் தீர்ப்பு வழங்கப்பட்ட சாமியார் குர்மீத் ராம்ரஹீம் சிங்கின் தேரா சச்சா சொளதா அமைப்பின் தலைமையகத்தை சுற்றிலும் ராணுவம், போலீஸ், அதிரடிப் படை ஆகியவை குவிக்கப்பட்டுள்ளன.

தேரா தலைமையகத்திலும், மாநிலம் முழுவதிலும் அமைந்துள்ள தேராவின் கூடுகை மையங்களிலும் சோதனை நடத்தி, ஆயுதங்கள் இருந்தாால் கைப்பற்றும்படி ஹரியானா அரசு உத்தரவிட்டுள்ளதாக கூடுதல் தலைமைச் செயலாளர் (உள்துறை) ராம்நிவாஸ் பி.டி.ஐ. செய்தி நிறுவனத்திடம் தெரிவித்துள்ளார்.

ராம் ரஹீம் சிங் குற்றவாளி என தீர்ப்பு வழங்கப்பட்ட உடனே அவரது ஆதரவாளர்கள் ஹரியானா மற்றும் டில்லியின் பல பாகங்களில் வன் செயல்களில் ஈடுபட்டனர்.

ஹரியானா மாநிலத்தின் பல பாகங்களில் இயல்பு வாழ்க்கை பாதிக்கப்பட்டது.

வன்முறையிலும், போலீஸ் துப்பாக்கிச் சூட்டிலும் 31 பேர் கொல்லப்பட்டனர். 250 பேர் காயமடைந்தனர்.

சி.பி.ஐ. நீதிமன்றம் அமைந்துள்ள பஞ்ச்குலாவில் வெள்ளிக்கிழமை வன்முறை மையம் கொண்டிருந்தது.

எனினும் அங்கு சனிக்கிழமை ஊரடங்கு தளர்த்தப்பட்டது. சிர்சாவில் தேரா சச்சா சௌதாவின் தலைமையகம் அமைந்திருப்பதாலும், அங்கு ஆயிரக்கணக்கில் சாமியாரின் ஆதரவாளர்கள் திரண்டிருந்ததாலும் அங்கு பதற்றம் நீடித்தது.

எனவே, சிர்சாவின் சில பகுதிகளில் சனிக்கிழமையும் ஊரடங்கு நீடித்தது.

ஆகஸ்டு 15-ம் தேதி தமது பிறந்த நாளைக் கொண்டாடுவதற்கு தலைமையகத்துக்கு வருமாறு தமது ஆதரவாளர்களுக்கு அழைப்பு விடுத்திருந்தார் ராம்ரஹீம் சிங்.

இதையடுத்து பல நூறு ஏக்கர் பரப்பளவில் அமைந்துள்ள தேரா வளாகத்தில் 20 ஆயிரம் பேர் குழுமினர்.

அவர்களில் பலர் தீர்ப்பு வரும் வரை அங்கேயே தங்கி இருக்கும்படி கேட்டுக்கொள்ளப்பட்டனர்.

போலீசார் ஒலி பெருக்கி மூலம் அவர்களை வெளியேறும்படி சனிக்கிழமை கேட்டுக்கொண்டதை அடுத்து பலர் வளாகத்தை விட்டு வெளியேறினர். அவர்களில் பலரிடம் இருந்து தடி, பாட்டில்கள், கத்தி, பெட்ரோல் குண்டு ஆகியவை கைப்பற்றப்பட்டதாகப் போலீசார் தெரிவிக்கின்றனர்.

வெளியேறுகிறவர்கள் ஊர்களுக்குத் திரும்ப சிர்சாவில் பேருந்துகள் இல்லை. எனவே, அவர்கள் நடந்தே ராஜஸ்தான் எல்லை நோக்கிச் செல்கின்றனர்.

சனிக்கிழமை பகல் நிலவரப்படி தேரா வளாகத்தில் ராம் ரஹீம் ஆதரவாளர்கள் சுமார் ஆயிரம் பேர் இருக்கக்கூடும் என்று சொல்லப்படுகிறது.

ராணுவத்தினர் வளாகத்துக்கு வெளியே கொடி அணி வகுப்பு நடத்தினர். மாலை வாக்கில், ராணுவத்தினர், போலீசார், அதிரடிப்படையினர் தேரா வளாகத்தில் நுழையக்கூடும் என்று கூறப்படுகிறது.